Medusa 

by Benilda Santos

Siya na nakapantalon

at mainit ang hininga

inihiga ako sa gilid ng mundo

at tiningnan ako nang tiningnan

hanggang sa mangalisag 

ang aking buhok

at sa matinding galit at takot

maging ahas ang bawat isa sa kanila

gutom na gutom

sa lasa ng laman

ng labing may pawis ng pagnanasa

hanggang sa madurog

ang aking puso

at sa di-mapatid na sakit at pait

maging buto ito

malamig na malamig ang pintig.

Ngayong lupang latag na latag na

ang aking katawan

sa ilalim ng malulupit mong talampakan

ikaw naman ang aking tiningnan nang tiningnan

hanggang sa matuyo ka

sa apoy ng aking mga mata

at sipsipin ng bawat ahas kong buhok

ang bawat patak ng dugo sa iyong mga ugat

at  masimot ang kaliit-liitang kutob ng buhay.

Namangha ka sa liyab ng aking higanti?

Ay! Ikaw ang guro't hari ko, Lalaki.