Disgrasyada

by Erlinda K. Alburo

Mao kana ang pasundayag sa unahang karsada.

Apan ngano man diay Inday kon mailhan kang disgrasyada

kay kuno ikaw na-inahan apan dili diay asawa?

May nag-ingon baya nga taga-diin tong magbabalak

nga ang rosas nga laig ngalan humot rosas gihapon ang pagkabulak.

Kaayo ba lang nianang may anak nga gipadako

nga masugo-sugo sa paglukot og lumboyng tabako

labi nag babaye ka mopukaw kon ikaw gibangungot

maga-awit nga manulsi sa agi sa imong singot

ug kon malalaki man maantigo kanang mokalos

mopadailos sa lubi ug mopasayaw sa kawayang bulos.

Nan, kinsa man unya ang tinuod nga disgrasyada:

kadto bang na-inahan nga dili intawon asawa

o ang asawang wala nay anak wala pa gyuy bana?