Gahasa

by Elynia Mabanglo

At nag-iba ang pag-asa,

Minsan lang,

Minsan lang,

Ginahasa ako ng pasya.

Pinag-arala't pinangaralan ang ngalan ko't

kasarian,

Nagsakdal ako sa bayan;

Binusisi't binuyangyang ang aking bikas

Nagsumbong ako sa batas.

Sa madlang hagupit

Bitak-bitak ang bungo,

Ang haplit ng tinig 

Pumintog sa puson

Hanggang pagkatao'y mapariwara;

Paulit-ulit,

Paulit-ulit,

Ginahasa ako ng mga akala.

Ang katal ng tinig, bumalandrang lagim,

Nagsakdal ako sa dingding;

Sumugat ang sumbat sa yakap ng hangin

Nagsumbong ako sa dilim.

Lama'y salanta

Pasa-pasa ang puso

Sa mga alimura.

Buntis ang alaala

Hanggang magutay ang diwa,

Paulit-ulit,

Paulit-ulit,

Ginahasa ko ng mga salita.